Pistis Sophia Book 1 Part 7
normalized analytic TEI ANNIS PAULA Search ANNIS
Previous Next

Normalized Text

ⲛⲅϯϩⲧⲏⲕⲉⲡⲁϩⲁⲡ·ϯϩⲧⲏⲕⲉⲡⲁϫⲓⲕⲃⲁⲡⲁⲛⲟⲩⲧⲉⲁⲩⲱⲡⲁϫⲟⲉⲓⲥ·ⲕⲣⲓⲛⲉⲙⲙⲟⲓⲡϫⲟⲉⲓⲥⲕⲁⲧⲁⲧⲁⲇⲓⲕⲁⲓⲟⲥⲩⲛⲏ·ⲙⲡⲣⲧⲣⲉⲩⲣⲁϣⲉⲙⲙⲟⲓⲡⲁⲛⲟⲩⲧⲉ·ⲟⲩⲇⲉⲙⲡⲣⲧⲣⲉⲩϫⲟⲟⲥϫⲉⲉⲩⲅⲉⲧⲉⲛⲯⲩⲭⲏ·ⲙⲡⲣⲧⲣⲉⲩϫⲟⲟⲥϫⲉⲁⲛⲟⲙⲕϥ·ⲙⲁⲣⲟⲩϫⲓϣⲓⲡⲉⲛⲥⲉⲟⲩⲱⲗⲥϩⲓⲟⲩⲥⲟⲡ·ⲛϭⲓⲛⲉⲧⲣⲁϣⲉⲉϫⲛⲛⲁⲡⲉⲧϩⲟⲟⲩ·
ⲙⲁⲣⲟⲩϯϩⲓⲱⲟⲩⲛⲟⲩϣⲓⲡⲉⲙⲛⲟⲩⲟⲩⲱⲗⲥⲛϭⲓⲛⲉⲧϫⲉⲛⲟϭⲛϣⲁϫⲉⲉϩⲣⲁⲓⲉϫⲱⲓ·
ⲙⲁⲣⲟⲩⲧⲉⲗⲏⲗ·ⲛⲥⲉⲟⲩⲛⲟϥⲛϭⲓⲛⲉⲧⲟⲩⲉϣⲧⲁⲇⲓⲕⲁⲓⲟⲥⲩⲛⲏ·ⲁⲩⲱⲙⲁⲣⲟⲩϫⲟⲟⲥϫⲉⲙⲁⲣⲉⲡϫⲟⲉⲓⲥⲣⲛⲟϭⲛϥϫⲓⲥⲉⲛϭⲓⲛⲉⲧⲟⲩⲉϣⲧⲉⲓⲣⲏⲛⲏⲙⲡⲉϥϩⲙϩⲁⲗ:
ⲡⲁⲗⲁⲥⲛⲁⲧⲉⲗⲏⲗⲛⲧⲉⲕⲇⲓⲕⲁⲓⲟⲥⲩⲛⲏⲙⲛⲡⲉⲕⲧⲁⲉⲓⲟⲙⲡⲉϩⲟⲟⲩⲧⲏⲣϥ·
ⲍⲛⲁⲓϭⲉⲛⲧⲉⲣⲉϥϫⲟⲟⲩⲛϭⲓⲓⲁⲕⲕⲱⲃⲟⲥⲡⲉϫⲁϥⲛϭⲓⲓⲏⲥⲟⲩⲥϫⲉⲉⲩⲅⲉⲕⲁⲗⲱⲥⲓⲁⲕⲕⲱⲃⲟⲥⲡⲁⲓⲡⲉⲡⲃⲱⲗⲛⲧⲙⲉϩⲯⲓⲧⲉⲙⲙⲉⲧⲁⲛⲟⲓⲁⲛⲧⲡⲓⲥⲧⲓⲥⲥⲟⲫⲓⲁ·
ϩⲁⲙⲏⲛϩⲁⲙⲏⲛϯϫⲱⲙⲙⲟⲥⲛⲏⲧⲛϫⲉⲧⲉⲧⲛⲁⲣϣⲟⲣⲡⲉϩⲟⲩⲛⲉⲧⲙⲛⲧⲣⲣⲟⲛⲙⲡⲏⲩⲉϩⲁⲧϩⲏⲛⲛⲁϩⲟⲣⲁⲧⲟⲥⲧⲏⲣⲟⲩⲙⲛⲛⲛⲟⲩⲧⲉⲧⲏⲣⲟⲩ·ⲙⲛⲛⲛⲟⲩⲧⲉⲧⲏⲣⲟⲩⲙⲛⲛⲁⲣⲭⲱⲛⲧⲏⲣⲟⲩ·ⲛⲁⲓⲉⲧϣⲟⲟⲡϩⲙⲡⲙⲉϩⲙⲛⲧϣⲟⲙⲧⲉⲛⲁⲓⲱⲛ·ⲁⲩⲱϩⲙⲡⲙⲉϩⲙⲛⲧⲥⲛⲟⲟⲩⲥⲛⲁⲓⲱⲛ·
ⲛⲧⲱⲧⲛⲇⲉⲁⲛⲙⲁⲩⲁⲧⲧⲏⲩⲧⲛⲁⲗⲗⲁⲟⲩⲟⲛⲛⲓⲙⲟⲛⲉⲧⲛⲁⲣⲛⲁⲙⲩⲥⲧⲏⲣⲓⲟⲛ:
ⲛⲁⲓⲇⲉⲛⲧⲉⲣⲉϥϫⲟⲟⲩⲡⲉϫⲁϥⲛⲁⲩϫⲉⲧⲉⲧⲛⲛⲟⲉⲓϫⲉⲉⲓϣⲁϫⲉⲛⲙⲙⲏⲧⲛⲛⲁϣⲛϩⲉ:ⲁⲥϥⲟϭⲥⲟⲛⲉⲃⲟⲗⲛϭⲓⲙⲁⲣⲓϩⲁⲙ·
ⲡⲉϫⲁⲥϫⲉⲥⲉⲡϫⲟⲉⲓⲥ·ⲡⲁⲓⲡⲉⲉⲛⲧⲁⲕϫⲟⲟϥⲛⲁⲛⲙⲡⲓⲟⲩⲟⲉⲓϣϫⲉⲛϩⲁⲉⲉⲩⲛⲁⲣϣⲟⲣⲡ·ⲁⲩⲱⲛⲧⲉⲛϣⲟⲣⲡⲣϩⲁⲉ·ⲛϣⲟⲣⲡϭⲉⲉⲛⲧⲁⲩⲧⲁⲙⲓⲟⲟⲩϩⲁⲧⲛⲉϩⲏ:ⲛⲉⲛⲁϩⲟⲣⲁⲧⲟⲥ·
ⲉⲡⲉⲓⲇⲏⲛⲧⲟⲟⲩⲡⲉⲉⲛⲧⲁⲩϣⲱⲡⲉϩⲁⲧϩⲏⲛⲧⲙⲛⲧⲣⲱⲙⲉⲛⲧⲟⲟⲩⲙⲛⲛⲛⲟⲩⲧⲉⲙⲛⲛⲁⲣⲭⲱⲛⲁⲩⲱⲛⲣⲱⲙⲉⲉⲧⲛⲁϫⲓⲙⲩⲥⲧⲏⲣⲓⲟⲛⲥⲉⲛⲁⲣϣⲟⲣⲡⲉⲣⲟⲟⲩⲉϩⲟⲩⲛⲉⲧⲙⲛⲧⲣⲣⲟⲛⲙⲡⲏⲩⲉ.
ⲡⲉϫⲁϥⲛⲁⲥⲛϭⲓⲓⲏⲥⲟⲩⲥϫⲉⲉⲩⲅⲉⲙⲁⲣⲓϩⲁⲙ·ⲁϥⲟⲩⲱϩⲟⲛⲉⲧⲟⲟⲧϥⲛϭⲓⲓⲏⲥⲟⲩⲥⲡⲉϫⲁϥⲛⲛⲉϥⲙⲁⲑⲏⲧⲏⲥ·ϫⲉⲁⲥϣⲱⲡⲉϭⲉⲛⲧⲉⲣⲉⲥⲧⲁⲩⲉⲧⲙⲉϩⲯⲓⲧⲉⲙⲙⲉⲧⲁⲛⲟⲓⲁⲛϭⲓⲧⲡⲓⲥⲧⲓⲥⲥⲟⲫⲓⲁ·ⲁⲥϩⲱϫⲟⲛⲙⲙⲟⲥⲛϭⲓϯϭⲟⲙⲛϩⲟⲙⲙⲟⲩⲓ·ⲉⲥⲟⲩⲉϣϥⲓϭⲟⲙⲛⲓⲙⲛϩⲏⲧⲥ·
ⲁⲥⲱϣⲟⲛⲉϩⲣⲁⲓⲉⲡⲟⲩⲟⲉⲓⲛⲉⲥϫⲱⲙⲙⲟⲥϫⲉⲡⲟⲩⲟⲉⲓⲛⲉⲛⲧⲁⲓⲡⲓⲥⲧⲉⲩⲉⲉⲣⲟϥϫⲓⲛⲛϣⲟⲣⲡⲉⲛⲧⲁⲓϣⲉⲡⲛⲉⲓⲛⲟϭⲛϩⲓⲥⲉⲉⲧⲃⲏⲏⲧⲕⲃⲟⲏⲑⲉⲓⲉⲣⲟⲓ·ⲁⲩⲱⲁⲩϫⲓⲛⲧⲟⲟⲧⲥⲛⲧⲉⲥⲙⲉⲧⲁⲛⲟⲓⲁⲛⲧⲉⲩⲛⲟⲩⲉⲧⲙⲙⲁⲩ·
ⲁϥⲥⲱⲧⲙⲉⲣⲟⲥⲛϭⲓⲡⲓϣⲟⲣⲡⲙⲙⲩⲥⲧⲏⲣⲓⲟⲛ·ⲁⲩⲱⲁⲩⲧⲛⲛⲟⲟⲩⲧϩⲓⲧⲛⲧⲉϥⲕⲉⲗⲉⲩⲥⲓⲥⲁⲓⲉⲓⲉⲃⲟⲏⲑⲉⲓⲉⲣⲟⲥ·ⲁⲓⲛⲧⲥⲉϩⲣⲁⲓϩⲙⲡⲉⲭⲁⲟⲥ.ϫⲉⲁⲥⲙⲉⲧⲁⲛⲟⲉⲓ·ⲁⲩⲱⲟⲛⲉⲃⲟⲗϫⲉⲁⲥⲡⲓⲥⲧⲉⲩⲉⲉⲡⲟⲩⲟⲉⲓⲛ.ⲁⲥϣⲉⲡⲛⲉⲓⲛⲟϭⲛϩⲓⲥⲉ·ⲙⲛⲛⲉⲓⲛⲟϭⲛϭⲓⲛⲇⲩⲛⲟⲥ·ⲁⲩⲣϩⲁⲗⲙⲙⲟⲥϩⲓⲧⲙⲡⲓⲁⲩⲑⲁⲇⲏⲥⲛⲛⲟⲩⲧⲉ·ⲁⲩⲱⲙⲡⲟⲩⲣϩⲁⲗⲙⲙⲟⲥϩⲓⲧⲛⲗⲁⲁⲩⲛϩⲱⲃⲉⲓⲙⲏⲧⲓϩⲓⲧⲛⲟⲩⲇⲩⲛⲁⲙⲓⲥⲛⲟⲩⲟⲉⲓⲛⲉⲧⲃⲉⲡⲉⲓⲛⲉⲙⲡⲟⲩⲟⲉⲓⲛⲛⲧⲁⲥⲡⲓⲥⲧⲉⲩⲉⲉⲣⲟϥ·ⲉⲧⲃⲉⲡⲁⲓϭⲉⲁⲩⲧⲛⲛⲟⲟⲩⲧϩⲓⲧⲛⲧⲕⲉⲗⲉⲩⲥⲓⲥⲙⲡⲓϣⲟⲣⲡⲙⲙⲩⲥⲧⲏⲣⲓⲟⲛ·ⲉⲧⲣⲁⲃⲟⲏⲑⲉⲓⲉⲣⲟⲥϩⲛⲟⲩⲡⲉⲧϩⲏⲡ·
ⲛⲛⲉⲙⲡⲁⲧⲓⲉⲓⲇⲉⲡⲉⲉⲡⲧⲟⲡⲟⲥⲛⲛⲁⲓⲱⲛⲉⲡⲧⲏⲣϥ·ⲁⲗⲗⲁⲁⲓⲉⲓⲉⲃⲟⲗϩⲛⲧⲉⲩⲙⲏⲧⲉⲧⲏⲣⲟⲩⲉⲙⲡⲉⲗⲁⲁⲩⲛϭⲟⲙⲉⲓⲙⲉ·ⲟⲩⲧⲉⲛⲁⲡⲥⲁⲛϩⲟⲩⲛⲛⲧⲉⲡⲥⲁⲛϩⲟⲩⲛ·ⲟⲩⲧⲉⲛⲁⲡⲥⲁⲛⲃⲟⲗⲛⲧⲉⲡⲥⲁⲛⲃⲟⲗ·ⲉⲓⲙⲏⲧⲓⲉⲡⲓϣⲟⲣⲡⲙⲙⲩⲥⲧⲏⲣⲓⲟⲛⲙⲙⲁⲧⲉ·
ⲍⲁⲥϣⲱⲡⲉϭⲉⲛⲧⲉⲣⲓⲉⲓⲉⲡⲉⲭⲁⲟⲥⲉⲃⲟⲏⲑⲉⲓⲉⲣⲟⲥ.ⲁⲥⲛⲁⲩⲉⲣⲟⲓⲉⲓⲟⲛⲛⲟⲉⲣⲟⲥ·ⲁⲩⲱⲉⲓⲟⲛⲟⲩⲟⲉⲓⲛⲉⲙⲁϣⲟ.ⲉⲓϣⲟⲟⲡϩⲛⲟⲩⲙⲛⲧⲛⲁⲏⲧⲉϩⲟⲩⲛⲉⲣⲟⲥ·
ⲛⲉⲓⲟⲅⲁⲣⲁⲛⲡⲉⲛⲁⲩⲑⲁⲇⲏⲥⲛⲧϩⲉⲛϯϭⲟⲙⲛϩⲟⲙⲙⲟⲩⲓⲧⲁⲓⲉⲛⲧⲁⲥϥⲓⲧϭⲟⲙⲛⲟⲩⲟⲉⲓⲛϩⲛⲧⲥⲟⲫⲓⲁ·ⲁⲩⲱⲟⲛⲧⲁⲓⲉⲧϩⲱϫⲙⲙⲟⲥⲉϥⲓⲡⲟⲩⲟⲉⲓⲛⲧⲏⲣϥⲉⲧⲛϩⲏⲧⲥ·ⲁⲥⲛⲁⲩϭⲉⲉⲣⲟⲓⲉⲓⲟⲛⲟⲩⲟⲉⲓⲛⲛϭⲓⲧⲥⲟⲫⲓⲁⲛϩⲟⲩⲟⲉϯⲇⲩⲛⲁⲙⲓⲥⲛϩⲟⲙⲙⲟⲩⲓⲛⲟⲩⲏⲡⲉⲛⲧⲃⲁⲛⲕⲱⲃⲛⲥⲟⲡ·ⲁⲩⲱⲉⲓϣⲟⲟⲡϩⲛⲟⲩⲙⲛⲧⲛⲁⲏⲧⲉϩⲟⲩⲛⲉⲣⲟⲥ·ⲁⲩⲱⲁⲥⲉⲓⲙⲉϫⲉⲁⲛⲅⲟⲩⲉⲃⲟⲗϩⲙⲡϫⲓⲥⲉⲛⲛϫⲓⲥⲉ·ⲡⲁⲓⲉⲛⲧⲁⲥⲡⲓⲥⲧⲉⲩⲉⲉⲡⲉϥⲟⲩⲟⲉⲓⲛϫⲓⲛⲛϣⲟⲣⲡ·ⲁⲥⲧⲱⲕϭⲉⲛϩⲏⲧⲛϭⲓⲧⲡⲓⲥⲧⲓⲥⲥⲟⲫⲓⲁ·ⲁⲩⲱⲁⲥϫⲱⲛⲧⲙⲉϩⲙⲏⲧⲉⲙⲙⲉⲧⲁⲛⲟⲓⲁⲉⲥϫⲱⲙⲙⲟⲥϫⲉⲁⲓⲱϣⲉϩⲣⲁⲓⲉⲣⲟⲕⲡⲟⲩⲟⲉⲓⲛⲛⲧⲉⲛⲓⲟⲩⲟⲉⲓⲛϩⲙⲡⲧⲣⲓϩⲱϣⲁⲕⲥⲱⲧⲙⲉⲣⲟⲓⲡⲟⲩⲟⲉⲓⲛⲛⲟⲩϩⲙⲛⲧⲁϭⲟⲙⲉⲃⲟⲗϩⲛϩⲉⲛⲥⲡⲟⲧⲟⲩⲛϫⲓⲛϭⲟⲛⲥ·ⲁⲩⲱⲛⲁⲛⲁⲙⲟⲥ·ⲁⲩⲱⲉⲃⲟⲗϩⲛϩⲉⲛϭⲟⲣϭⲥⲛⲕⲣⲟϥ·ⲡⲟⲩⲟⲉⲓⲛⲉⲧⲟⲩⲛⲁϥⲓⲧϥⲛϩⲏⲧ.ϩⲛⲟⲩϭⲟⲣϭⲥⲛⲕⲣⲟϥ·
ⲛⲉⲩⲛⲁⲛⲧϥⲛⲁⲕⲁⲛ.ⲛϭⲟⲣϭⲥϭⲁⲣⲙⲡⲁⲩⲑⲁⲇⲏⲥⲥⲱⲧⲏⲣⲉⲃⲟⲗ·ⲁⲩⲱⲙⲛⲛϩⲁϭⲉⲛⲧⲉⲡⲓⲁⲧⲛⲁ.
ⲟⲩⲟⲓⲛⲁⲓⲁⲛⲟⲕϫⲉⲁⲡⲁⲙⲁⲛϣⲱⲡⲉⲟⲩⲉ·ⲁⲩⲱⲁⲓϣⲱⲡⲉϩⲛⲙⲙⲁⲛϣⲱⲡⲉⲛⲧⲉⲡⲉⲭⲁⲟⲥ·ⲁⲧⲁϭⲟⲙϣⲱⲡⲉϩⲛϩⲉⲛⲧⲟⲡⲟⲥⲛⲛⲟⲩⲓⲁⲛⲛⲉ·ⲁⲩⲱⲁⲓⲕⲱⲣϣⲉⲛⲓⲁⲧⲛⲁⲉⲧⲙⲙⲁⲩ·ⲁⲩⲱⲉⲓϣⲁⲛⲕⲱⲣϣⲉⲣⲟⲟⲩϣⲁⲩϯⲟⲩⲃⲏⲓⲉⲡϫⲓⲛϫⲏ·
ⲛⲁⲓϭⲉⲛⲧⲉⲣⲉⲓⲏⲥⲟⲩⲥϫⲟⲟⲩⲉⲛⲉϥⲙⲁⲑⲏⲧⲏⲥⲡⲉϫⲁϥⲛⲁⲩϭⲉⲧⲉⲛⲟⲩϭⲉⲡⲉⲧⲉⲣⲉⲡⲉϥⲡⲛⲁⲕⲓⲙⲉⲣⲟϥⲙⲁⲣⲉϥⲉⲓⲉⲧϩⲏ·ⲛϥϫⲱⲙⲡⲃⲱⲗⲛⲧⲙⲉϩⲙⲏⲧⲉⲙⲙⲉⲧⲁⲛⲟⲓⲁⲛⲧⲡⲓⲥⲧⲓⲥⲥⲟⲫⲓⲁ·ⲁϥⲟⲩⲱϣⲃⲛϭⲓⲡⲉⲧⲣⲟⲥⲡⲉϫⲁϥϫⲉⲡϫⲟⲉⲓⲥ·ⲉⲧⲃⲉⲡⲁⲓⲟⲛⲁⲧⲉⲕϭⲟⲙⲛⲟⲩⲟⲉⲓⲛⲡⲣⲟⲫⲏⲧⲉⲩⲉϩⲓⲧⲛⲇⲁⲩⲉⲓⲇ·ⲙⲡⲓⲟⲩⲟⲉⲓϣⲉⲥϫⲱⲙⲙⲟⲥϩⲙⲡⲙⲉϩϣⲉⲙⲛⲙⲛⲧⲯⲓⲥⲙⲯⲁⲗⲙⲟⲥ·ϫⲉⲁⲓⲱϣⲉϩⲣⲁⲓⲉⲣⲟⲕⲡϫⲟⲉⲓⲥϩⲙⲡⲧⲣⲁϩⲱϣ.
ⲁⲕⲥⲱⲧⲙⲉⲣⲟⲓ·ⲡϫⲟⲉⲓⲥⲛⲟⲩϩⲙⲛⲧⲁⲯⲩⲭⲏⲉⲃⲟⲗϩⲛϩⲉⲛⲥⲡⲟⲧⲟⲩⲛϫⲓⲛϭⲟⲛⲥ.ⲁⲩⲱⲉⲃⲟⲗϩⲓⲧⲛⲟⲩⲗⲁⲥⲛⲕⲣⲟϥ·ⲉⲩⲛⲁϯⲟⲩⲛⲁⲕⲁⲩⲱⲉⲩⲛⲁⲟⲩⲉϩⲟⲩⲉⲣⲟⲕ.ⲛⲛⲁϩⲣⲛⲟⲩⲗⲁⲥⲛⲕⲣⲟϥ·ⲛⲥⲟⲧⲉⲙⲡϫⲱⲱⲣϣⲟⲗϭⲙⲛⲛⲁⲛⲑⲣⲁⲝⲛⲧⲉⲡϫⲁⲓⲉ·
ⲟⲩⲟⲓⲛⲁⲓϫⲉⲁⲡⲁⲙⲁⲛϣⲱⲡⲉⲟⲩⲉⲉⲃⲟⲗ·ⲁⲓⲟⲩⲱϩϩⲛⲙⲙⲁⲛϣⲱⲡⲉⲛⲕⲏⲇⲁⲣ·ⲁⲧⲁⲯⲩⲭⲏⲣⲣⲙⲛϭⲟⲉⲓⲗⲉϩⲛⲟⲩⲙⲏⲏϣⲉⲙⲙⲁ·ⲛⲉⲓⲟⲛⲉⲓⲣⲏⲛⲓⲕⲟⲥⲡⲉⲙⲛⲛⲉⲧⲙⲟⲥⲧⲉⲛⲧⲉⲓⲣⲏⲛⲏ·ⲉⲓϣⲁⲛϣⲁϫⲉⲛⲙⲙⲁⲩ.ϣⲁⲩⲙⲓϣⲉⲛⲙⲙⲁⲓⲛϫⲓⲛϫⲏ·
ⲡⲁⲓϭⲉⲧⲉⲛⲟⲩⲡϫⲟⲉⲓⲥⲡⲉⲡⲃⲱⲗⲛⲧⲙⲉϩⲙⲏⲧⲉⲙⲙⲉⲧⲁⲛⲟⲓⲁⲛⲧⲡⲓⲥⲧⲓⲥⲥⲟⲫⲓⲁ·ⲧⲉⲛⲧⲁⲥϫⲟⲟⲥⲉⲩϩⲱϫⲙⲙⲟⲥⲛϭⲓⲛⲉⲡⲣⲟⲃⲟⲗⲟⲟⲩⲉⲛϩⲩⲗⲓⲕⲟⲛ·ⲛⲧⲉⲡⲁⲩⲑⲁⲇⲏⲥ·
ⲛⲧⲟⲟⲩⲙⲛⲧⲉϥϭⲟⲙⲛϩⲟⲙⲙⲟⲩⲓ:ⲁⲩⲱⲛⲧⲉⲣⲟⲩⲑⲗⲓⲃⲉⲙⲙⲟⲥⲉⲙⲁϣⲟ·
ⲡⲉϫⲁϥⲛⲁϥⲛϭⲓⲓⲏⲥⲟⲩⲥϫⲉⲉⲩⲅⲉⲡⲉⲧⲣⲟⲥⲁⲩⲱⲕⲁⲗⲱⲥ·
ⲡⲁⲓⲡⲉⲡⲃⲱⲗⲛⲧⲙⲉϩⲙⲏⲧⲉⲙⲙⲉⲧⲁⲛⲟⲓⲁⲛⲧⲡⲓⲥⲧⲓⲥⲥⲟⲫⲓⲁ·
ⲍⲁϥⲟⲩⲱϩⲟⲛⲉⲧⲟⲟⲧϥⲛϭⲓⲓⲏⲥⲟⲩⲥϩⲙⲡϣⲁϫⲉⲡⲉϫⲁϥⲛⲛⲉϥⲙⲁⲑⲏⲧⲏⲥϫⲉⲁⲥϣⲱⲡⲉϭⲉⲛⲧⲉⲣⲉⲥⲛⲁⲩⲉⲣⲟⲓⲛϭⲓϯϭⲟⲙⲛϩⲟⲙⲙⲟⲩⲓⲉⲁⲓϩⲱⲛⲉϩⲟⲩⲛⲉⲧⲡⲓⲥⲧⲓⲥⲥⲟⲫⲓⲁⲉⲓⲟⲛⲟⲩⲟⲉⲓⲛⲉⲙⲁϣⲟⲉⲙⲁϣⲟ.
ⲁⲥϭⲱⲛⲧⲉⲡⲉϩⲟⲩⲟ.ⲁⲩⲱⲁⲥⲡⲣⲟⲃⲁⲗⲉⲉⲃⲟⲗⲛϩⲏⲧⲥⲛⲕⲉⲙⲏⲏϣⲉⲙⲡⲣⲟⲃⲟⲗⲏⲉⲩⲛⲁϣⲧⲉⲙⲁϣⲟ·
ⲛⲁⲓϭⲉⲛⲧⲉⲣⲟⲩϣⲱⲡⲉ·ⲁⲥϫⲱⲛⲧⲙⲉϩⲙⲛⲧⲟⲩⲉⲙⲙⲉⲧⲁⲛⲟⲓⲁⲛϭⲓⲧⲡⲓⲥⲧⲓⲥⲥⲟⲫⲓⲁⲉⲥϫⲱⲙⲙⲟⲥ·ϫⲉⲁϩⲣⲟⲥⲁⲥϫⲓⲥⲉⲙⲙⲟⲥⲛϭⲓϯϭⲟⲙⲛϫⲱⲱⲣϩⲣⲁⲓϩⲛϩⲉⲛⲡⲉⲧϩⲟⲟⲩ·
ⲉⲣⲉⲡⲉⲥⲙⲉⲉⲩⲉϥⲓⲙⲡⲟⲩⲟⲉⲓⲛⲛϩⲏⲧ·ⲛⲟⲩⲟⲉⲓϣⲛⲓⲙ·ⲁⲩⲱⲛⲧϩⲉⲛⲟⲩⲡⲉⲛⲓⲡⲉⲉⲩϣⲱⲱⲧⲁⲩϥⲓⲛⲟⲩϭⲟⲙⲛϩⲏⲧⲁⲓⲙⲉⲣⲉⲉⲓⲉⲡⲉⲥⲏⲧⲉⲡⲉⲭⲁⲟⲥ·
ⲛϩⲟⲩⲟⲉϭⲱϩⲙⲡⲙⲟⲩⲙⲡⲙⲉϩⲙⲛⲧϣⲟⲙⲧⲉⲛⲁⲓⲱⲛ.ⲡⲧⲟⲡⲟⲥⲛⲧⲇⲓⲕⲁⲓⲟⲥⲩⲛⲏ·ⲁⲩⲱⲁⲩⲟⲩⲱϣⲉϫⲓⲧⲛⲕⲣⲟϥⲉⲧⲣⲉⲩⲟⲩⲱⲙⲕⲙⲡⲁⲟⲩⲟⲉⲓⲛⲧⲏⲣϥ·
ⲉⲧⲃⲉⲡⲁⲓϭⲉⲡⲟⲩⲟⲉⲓⲛⲛⲁϥⲓⲡⲉⲩⲟⲩⲟⲉⲓⲛⲧⲏⲣϥ·ⲁⲩⲱⲛⲥϣⲟⲣϣⲣⲛϭⲓⲧⲉⲩⲕⲉϩⲩⲗⲏⲧⲏⲣⲥ·ⲁⲩⲱϥⲛⲁϥⲓⲙⲡⲉⲩⲟⲓⲛⲁⲩⲱⲛϥⲧⲙⲕⲁⲁⲩⲉϣⲱⲡⲉϩⲙⲡⲙⲉϩⲙⲧϣⲟⲙⲧⲉⲛⲁⲓⲱⲛⲡⲉⲩⲙⲁⲛϣⲱⲡⲉ·ⲁⲩⲱⲛϥⲧⲙⲕⲁⲡⲉⲩⲣⲁⲛϩⲙⲡⲧⲟⲡⲟⲥⲛⲛⲉⲧⲛⲁⲱⲛϩ·ⲁⲩⲱⲥⲉⲛⲁⲛⲁⲩⲉⲛⲉⲛⲧⲁⲩϣⲱⲡⲉⲙⲙⲟⲱⲧϭⲟⲙⲛϩⲟⲙⲙⲟⲩⲓⲛϭⲓϯϫⲟⲩⲧⲁϥⲧⲉⲙⲡⲣⲟⲃⲟⲗⲏ·ⲛⲥⲉⲣϩⲟⲧⲉ·ⲁⲩⲱⲛⲥⲉⲧⲙⲣⲁⲧⲥⲱⲧⲙ·ⲁⲗⲗⲁⲛⲥⲉϯⲙⲡⲥⲱⲧϥⲙⲡⲉⲩⲟⲩⲟⲉⲓⲛ·ⲁⲩⲱⲥⲉⲛⲁⲛⲁⲩⲉⲣⲟ·ⲛⲥⲉⲣⲁϣⲉⲉϩⲣⲁⲓⲉϫⲱ.ⲛⲥⲉϫⲟⲟⲥϫⲉⲉⲓⲥⲟⲩⲡⲣⲟⲃⲟⲗⲏⲉⲙⲡⲥϯⲡⲥⲱⲧϥⲙⲡⲉⲥⲟⲩⲟⲉⲓⲛϫⲉⲉⲥⲉⲛⲟⲩϩⲙ·ⲁⲗⲗⲁⲥϣⲟⲩϣⲟⲩⲙⲙⲟⲥϩⲙⲡⲁϣⲁⲓⲙⲡⲟⲩⲟⲉⲓⲛⲛⲧⲉⲥϭⲟⲙ·ⲉⲃⲟⲗϫⲉⲙⲡⲥⲡⲣⲟⲃⲁⲗⲉⲉⲃⲟⲗϩⲛⲧϭⲟⲙⲉⲧⲛϩⲏⲧⲥ·ⲁⲩⲱⲁⲥϫⲟⲟⲥϫⲉϯⲛⲁϥⲓⲡⲟⲩⲟⲉⲓⲛⲛⲧⲡⲓⲥⲧⲓⲥⲥⲟⲫⲓⲁ·ⲡⲁⲓⲉⲧⲟⲩⲛⲁϥⲓⲧϥⲛⲧⲟⲟⲧⲥⲧⲉⲛⲟⲩϭⲉⲡⲉⲛⲧⲁⲧⲉϥϭⲟⲙϫⲓⲥⲉⲛϩⲏⲧϥ·ⲙⲁⲣⲉϥⲉⲓⲉⲧϩⲏⲛϥⲧⲁⲩⲉⲡⲃⲱⲗⲛⲧⲙⲉϩⲙⲛⲧⲟⲩⲉⲙⲙⲉⲧⲁⲛⲟⲓⲁⲛⲧⲡⲓⲥⲧⲓⲥⲥⲟⲫⲓⲁ.
ⲧⲟⲧⲉⲁⲥⲉⲓⲉⲧϩⲏⲛϭⲓⲥⲁⲗⲱⲙⲏⲡⲉϫⲁⲥϫⲉⲡⲁϫⲟⲉⲓⲥ·
ⲉⲧⲃⲉⲡⲁⲓⲁⲧⲉⲕϭⲟⲙⲛⲟⲩⲟⲉⲓⲛⲡⲣⲟⲫⲏⲧⲉⲩⲉⲙⲡⲓⲟⲩⲟⲉⲓϣϩⲓⲧⲛⲇⲁⲩⲉⲓⲇⲉⲥϫⲱⲙⲙⲟⲥϩⲙⲡⲙⲉϩⲧⲁⲓⲟⲩⲙⲛⲟⲩⲁⲙⲯⲁⲗⲙⲟⲥ·ϫⲉⲁϩⲣⲟϥⲡⲇⲩⲛⲁⲧⲟⲥϣⲟⲩϣⲟⲩⲙⲙⲟϥϩⲛⲧⲉϥⲕⲁⲕⲓⲁ·ⲁⲡⲉⲕⲗⲁⲥⲙⲉⲗⲉⲧⲁⲙⲡϫⲓⲛϭⲟⲛⲥⲙⲡⲉϩⲟⲟⲩⲧⲏⲣϥⲛⲧϩⲉⲛⲟⲩⲧⲟⲕⲛϩⲱⲱⲕⲉϥⲧⲏⲙ·ⲁⲕⲉⲓⲣⲉⲛⲟⲩⲕⲣⲟϥ·ⲁⲕⲙⲉⲣⲉⲧⲕⲁⲣⲓⲁⲛϩⲟⲩⲟⲉⲡⲁⲅⲁⲑⲟⲛ·ⲁⲕⲙⲉⲣⲉⲡϫⲓⲛϭⲟⲛⲥⲉϩⲟⲩⲟⲉϣⲁϫⲉⲉⲧⲇⲓⲕⲁⲓⲟⲥⲩⲛⲏⲁⲕⲙⲉⲣⲉⲛϣⲁϫⲉⲧⲏⲣⲟⲩⲙⲡⲱⲙⲥ·ⲙⲛⲟⲩⲗⲁⲥⲛⲕⲣⲟϥ·ⲉⲧⲃⲉⲡⲁⲓⲡⲛⲟⲩⲧⲉⲛⲁϣⲣϣⲱⲣⲕϣⲁⲃⲟⲗϥⲛⲁⲡⲟⲣⲕⲕ·
ⲁⲩⲱⲛϥⲧⲟⲕⲙⲉⲕⲉⲃⲟⲗϩⲙⲡⲉⲕⲙⲁⲛϣⲱⲡⲉⲁⲩⲱϥⲛⲁⲧⲱⲗⲕⲛⲧⲉⲕⲛⲟⲩⲛⲉⲛϥⲛⲟϫⲥⲥⲁⲃⲟⲗⲛⲛⲉⲧⲟⲛϩ.
ⲇⲓⲁⲯⲁⲗⲙⲁ.
ⲛⲇⲓⲕⲁⲓⲟⲥⲛⲁⲛⲁⲩⲛⲥⲉⲣϩⲟⲧⲉⲁⲩⲱⲥⲉⲛⲁⲥⲱⲃⲉⲉϩⲣⲁⲓⲉϫⲱϥⲛⲥⲉϫⲟⲟⲥ·ϫⲉⲉⲓⲥⲟⲩⲣⲱⲙⲉⲉⲙⲡϥⲕⲁⲡⲛⲟⲩⲧⲉⲛⲁϥⲛⲃⲟⲏⲑⲟⲥ·ⲁⲗⲗⲁⲁϥⲛⲁϩⲧⲉⲉϫⲛⲧⲉϥⲙⲛⲧⲣⲙⲙⲁⲟⲉⲛⲁϣⲱⲥ·ⲁⲩⲱⲁϥϭⲙϭⲟⲙⲉϫⲙⲡⲉϥⲡⲉⲧϣⲟⲩⲉⲓⲧ·
ⲁⲛⲟⲕⲇⲉⲉⲓⲟⲛⲧϩⲉⲛⲟⲩⲃⲱⲛϫⲟⲉⲓⲧⲛⲣⲉϥϯⲕⲁⲣⲡⲟⲥϩⲙⲡⲏⲓⲙⲡⲛⲟⲩⲧⲉ·ⲁⲓⲛⲁϩⲧⲉⲉⲡⲛⲁⲙⲡⲛⲟⲩⲧⲉϣⲁⲉⲛⲉϩ·
ⲛⲧⲉⲡⲓⲉⲛⲉϩⲁⲩⲱϯⲛⲁⲟⲩⲱⲛϩⲛⲁⲕⲉⲃⲟⲗϫⲉⲁⲕⲉⲓⲣⲉⲛⲙⲙⲁⲓ·ⲁⲩⲱϯϩⲩⲡⲟⲙⲓⲛⲉⲉⲡⲉⲕⲣⲁⲛϫⲉⲟⲩⲭⲣⲏⲥⲧⲟⲛⲡⲉⲙⲡⲉⲙⲧⲟⲉⲃⲟⲗⲛⲛⲉⲕⲡⲉⲧⲟⲩⲁⲁⲃ·
ⲡⲁⲓϭⲉⲧⲉⲛⲟⲩⲡⲁϫⲟⲉⲓⲥⲡⲉⲡⲃⲱⲗⲛⲧⲙⲉϩⲙⲛⲧⲟⲩⲉⲙⲙⲉⲧⲁⲛⲟⲓⲁⲛⲧⲡⲓⲥⲧⲓⲥⲥⲟⲫⲓⲁ·ⲉⲁⲧⲉⲕϭⲟⲙⲛⲟⲩⲟⲉⲓⲛⲕⲓⲙⲉⲣⲟⲓⲁⲓϫⲟⲟϥⲕⲁⲧⲁⲡⲉⲕⲟⲩⲱϣ.
ⲍⲁⲥϣⲱⲡⲉϭⲉⲛⲧⲉⲣⲉⲓⲏⲥⲟⲩⲥⲥⲱⲧⲙⲉⲛⲉⲓϣⲁϫⲉⲉⲧⲁⲥϫⲟⲟⲩⲛϭⲓⲥⲁⲗⲱⲙⲏⲡⲉϫⲁϥϫⲉⲉⲩⲅⲉⲥⲁⲗⲱⲙⲏ·ϩⲁⲙⲏⲛϩⲁⲙⲏⲛϯϫⲱⲙⲙⲟⲥⲛⲏⲧⲛ·ϫⲉϯⲛⲁϫⲉⲕⲧⲏⲩⲧⲛⲉⲃⲟⲗϩⲙⲙⲩⲥⲧⲏⲣⲓⲟⲛⲛⲓⲙⲛⲧⲉⲡⲙⲛⲧⲣⲣⲟⲙⲡⲟⲩⲟⲉⲓⲛ·
ⲁϥⲟⲩⲱϩⲇⲉⲟⲛⲉⲧⲟⲟⲧϥⲛϭⲓⲓⲏⲥⲟⲩⲥϩⲙⲡϣⲁϫⲉⲡⲉϫⲁϥⲛⲛⲉϥⲙⲁⲑⲏⲧⲏⲥϫⲉⲁⲥϣⲱⲡⲉϭⲉⲙⲛⲛⲥⲁⲛⲁⲓ·ⲁⲓϩⲱⲛⲉϩⲟⲩⲉⲡⲉⲭⲁⲟⲥ·ⲉⲓⲟⲛⲟⲩⲟⲉⲓⲛⲉⲙⲁϣⲟⲉⲙⲁϣⲟϫⲉⲉⲓⲉϥⲓⲙⲡⲟⲩⲟⲉⲓⲛⲛⲧⲉϯϭⲟⲙⲛϩⲟⲙⲙⲟⲩⲓⲉⲧⲙⲙⲁⲩ·ⲉⲓⲟⲛⲟⲩⲟⲉⲓⲛⲉⲙⲁϣⲟⲁⲥⲣϩⲟⲧⲉⲁⲩⲱⲁⲥⲱϣⲉϩⲣⲁⲓⲉⲡⲉⲥⲛⲟⲩⲧⲉⲛⲁⲩⲁⲑⲁⲇⲏⲥⲉⲧⲣⲉϥⲃⲟⲏⲑⲉⲓⲉⲣⲟⲥⲁⲩⲱⲛⲧⲉⲩⲛⲟⲩⲉⲧⲙⲙⲁⲩⲁϥϭⲱϣⲧⲉⲃⲟⲗϩⲙⲡⲙⲉϩⲙⲛⲧϣⲟⲙⲧⲉⲛⲁⲓⲱⲛⲛϭⲓⲡⲛⲟⲩⲧⲉⲛⲁⲩⲑⲁⲇⲏⲥ·ⲁϥϭⲱϣⲧⲉⲡⲉⲥⲏⲧⲉⲡⲉⲭⲁⲟⲥ·ⲉϥϭⲟⲛⲧⲉⲙⲁϣⲟⲉϥⲟⲩⲉϣⲃⲟⲏⲑⲉⲓⲉⲧⲉϥϭⲟⲙⲛϩⲟⲙⲙⲟⲩⲓⲁⲩⲱⲛⲧⲉⲩⲛⲟⲩⲉⲧⲙⲙⲁⲩⲁⲥⲕⲱⲧⲉⲉⲧⲡⲓⲥⲧⲓⲥⲥⲟⲫⲓⲁⲛϭⲓϯϭⲟⲙⲛϩⲟⲙⲙⲟⲩⲓⲛⲧⲟⲥⲙⲛⲛⲉⲥⲡⲣⲟⲃⲟⲗⲟⲟⲩⲉⲧⲏⲣⲟⲩⲉⲩⲟⲩⲉϣϥⲓⲡⲟⲩⲟⲉⲓⲛⲧⲏⲣϥⲉⲧϩⲛⲧⲥⲟⲫⲓⲁ·
ⲁⲥϣⲱⲡⲉϭⲉⲛⲧⲉⲣⲟⲩϩⲱϫⲛⲧⲥⲟⲫⲓⲁ·
ⲁⲥⲱϣⲉϩⲣⲁⲓⲉⲡϫⲓⲥⲉⲉⲥⲱϣⲉϩⲣⲁⲓⲉⲣⲟⲓⲉⲧⲣⲁⲃⲟⲏⲑⲉⲓⲉⲣⲟⲥ
ⲁⲥϣⲱⲡⲉϭⲉⲛⲧⲉⲣⲉⲥϭⲱϣⲧⲉⲡϫⲓⲥⲉⲁⲥⲛⲁⲩⲉⲡⲁⲩⲑⲁⲇⲏⲥⲉϥϭⲟⲛⲧⲉⲙⲁϣⲟ·ⲁⲩⲱⲁⲥⲣϩⲟⲧⲉ·
ⲁⲥϫⲱⲛⲧⲙⲉϩⲙⲛⲧⲥⲛⲟⲟⲩⲥⲙⲙⲉⲧⲁⲛⲟⲓⲁⲉⲧⲃⲉⲡⲁⲩⲑⲁⲇⲏⲥⲙⲛⲛⲉϥⲡⲣⲟⲃⲟⲗⲟⲟⲩⲉⲁⲥⲱϣⲇⲉⲉϩⲣⲁⲓⲟⲩⲃⲏⲓⲉⲥϫⲱⲙⲙⲟⲥⲛⲧⲉⲓϩⲉϫⲉⲙⲡⲣⲟⲃϣⲕⲡⲟⲩⲟⲉⲓⲛⲉⲡⲁϩⲩⲙⲛⲟⲥϫⲉⲁⲩⲟⲩⲱⲛⲛⲣⲣⲱⲟⲩⲉϩⲣⲁⲓⲉϫⲱⲓⲛϭⲓⲡⲁⲩⲑⲁⲧⲏⲥⲙⲛⲧⲉϥϭⲟⲙⲛϩⲟⲙⲙⲟⲩⲓⲁⲩⲣⲕⲣⲟϥⲉⲣⲟⲓⲁⲩⲱⲁⲩⲕⲱⲧⲉⲉⲣⲟⲓⲉⲩⲟⲩⲉϣϥⲓⲛⲧⲁϭⲟⲙⲁⲩⲱⲁⲩⲙⲉⲥⲧⲱⲓϫⲉⲁⲓϩⲩⲙⲛⲉⲩⲉⲉⲣⲟⲕ·ⲉⲡⲙⲁⲛⲥⲉⲙⲉⲣⲓⲧ.ⲁⲩⲇⲓⲁⲃⲁⲗⲉⲙⲙⲟⲓ·
ⲁⲛⲟⲕⲇⲉⲛⲉⲓϩⲩⲙⲛⲉⲩⲉⲡⲉⲁⲩϣⲟϫⲛⲉⲉⲧⲣⲉⲩϥⲓⲛⲧⲁϭⲟⲙϫⲉⲁⲓϩⲩⲙⲛⲉⲩⲉⲉⲣⲟⲕⲡⲟⲩⲟⲉⲓⲛ·ⲁⲩⲱⲁⲩⲙⲉⲥⲧⲱⲓϫⲉⲁⲓⲙⲉⲣⲓⲧⲕ·ⲙⲁⲣⲉⲡⲕⲁⲕⲉⲉⲓⲉϩⲣⲁⲓⲉϫⲙⲡⲁⲩⲑⲁⲇⲏⲥ·ⲁⲩⲱⲙⲁⲣⲉϥϭⲱϩⲓⲟⲩⲛⲁⲙⲙⲙⲟϥⲛϭⲓⲡⲁⲣⲭⲱⲛⲙⲡⲕⲁⲕⲉⲉⲧϩⲓⲃⲟⲗ·ⲁⲩⲱϩⲙⲡⲧⲣⲉⲕϯϩⲁⲡⲉⲣⲟϥϥⲓⲛⲧⲉϥϭⲟⲙⲛϩⲏⲧϥ·ⲁⲩⲱⲡϩⲱⲃⲉⲛⲧⲁϥⲙⲉⲉⲩⲉⲉⲣⲟϥⲉϥⲓⲡⲁⲟⲩⲟⲉⲓⲛⲛϩⲏⲧ.
ⲉⲕⲉϥⲓⲡⲱϥⲛϩⲏⲧϥ·ⲁⲩⲱⲙⲁⲣⲟⲩⲱϫⲛⲛϭⲓⲛⲉϥϭⲟⲙⲧⲏⲣⲟⲩⲛⲧⲉⲛⲉϥⲟⲩⲟⲉⲓⲛⲉⲧⲛϩⲏⲧϥ·ⲁⲩⲱⲙⲁⲣⲉⲕⲉⲟⲩⲁϫⲓⲛⲧⲉϥⲙⲛⲧⲛⲟϭϩⲙⲡϣⲟⲙⲧⲛⲧⲣⲓⲇⲩⲛⲁⲙⲟⲥⲙⲁⲣⲟⲩⲣⲁⲧⲟⲩⲟⲓⲛⲛϭⲓⲛϭⲟⲙⲧⲏⲣⲟⲩⲛⲧⲉⲛⲉϥⲡⲣⲟⲃⲟⲗⲟⲟⲩⲉ·ⲁⲩⲱⲛⲧⲉⲧⲉϥϩⲩⲗⲏϣⲱⲡⲉⲉⲙⲛⲟⲩⲟⲉⲓⲛⲛϩⲏⲧⲥ·ⲙⲁⲣⲉⲛⲉϥⲡⲣⲟⲃⲟⲗⲟⲟⲩⲉϭⲱϩⲙⲡⲉⲭⲁⲟⲥ·ⲛⲥⲉⲧⲙⲕⲁⲁⲩⲉⲃⲱⲕⲉⲡⲉⲩⲧⲟⲡⲟⲥⲙⲁⲣⲉⲡⲉⲩⲟⲩⲟⲉⲓⲛⲱϫⲛⲉⲧⲛϩⲏⲧⲟⲩⲁⲩⲱⲙⲡⲣⲧⲣⲉⲩⲕⲁⲁⲩⲉⲃⲱⲕⲉϩⲣⲁⲓⲉⲡⲙⲉϩⲙⲛⲧϣⲟⲙⲧⲉⲛⲁⲓⲱⲛⲡⲉⲩⲧⲟⲡⲟⲥ·ⲙⲁⲣⲉϥⲥⲱⲧϥⲛⲛⲟⲩⲟⲉⲓⲛⲧⲏⲣⲟⲩⲉⲧϣⲟⲟⲡϩⲙⲡⲁⲩⲑⲁⲧⲏⲥⲛϭⲓⲡⲡⲁⲣⲁⲗⲏⲙⲧⲥⲡⲣⲉϥⲥⲱⲧϥⲛⲛⲟⲩⲟⲉⲓⲛ·ⲁⲩⲱⲙⲁⲣⲉϥϥⲓⲧⲟⲩⲛⲧⲟⲟⲧⲟⲩ·ⲙⲁⲣⲟⲩⲁⲙⲁϩⲧⲉⲉϫⲛⲛⲉϥⲡⲣⲟⲃⲟⲗⲟⲟⲩⲉ·ⲛϭⲓⲛⲁⲣⲭⲱⲛⲙⲡⲕⲁⲕⲉⲙⲡⲉⲥⲏⲧ·ⲁⲩⲱⲙⲡⲣⲧⲣⲉⲗⲁⲁⲩϣⲟⲡϥⲉⲣⲟϥϩⲙⲡⲉϥⲧⲟⲡⲟⲥ·ⲁⲩⲱⲙⲡⲣⲧⲣⲉⲗⲁⲁⲩⲥⲱⲧⲙⲉⲧϭⲟⲙⲛⲛⲉϥⲡⲣⲟⲃⲟⲗⲟⲟⲩⲉϩⲙⲡⲉⲭⲁⲟⲥ·ⲙⲁⲣⲟⲩϥⲓⲡⲟⲩⲟⲉⲓⲛⲉⲧϩⲛⲛⲉϥⲡⲣⲟⲃⲟⲗⲟⲟⲩⲉⲁⲩⲱⲛⲥⲉⲗⲁϭⲉⲉⲡⲉⲩⲣⲁⲛϩⲣⲁⲓϩⲙⲡⲙⲉϩⲙⲛⲧϣⲟⲙⲧⲉⲛⲁⲓⲱⲛ·
ⲛⲧⲟϥϩⲱⲱϥⲛⲥⲉϥⲓⲡⲉϥⲣⲁⲛⲉⲃⲟⲗϩⲙⲡⲧⲟⲡⲟⲥⲉⲧⲙⲙⲁⲩϣⲁⲉⲛⲉϩ·ⲁⲩⲱⲧϭⲟⲙⲛϩⲟⲙⲙⲟⲩⲓⲙⲁⲣⲟⲩⲉⲓⲛⲉⲉϩⲣⲁⲓⲉϫⲱⲥⲙⲡⲛⲟⲃⲉⲙⲡⲉⲛⲧⲁϥⲡⲣⲟⲃⲁⲗⲉⲙⲙⲟⲥⲉⲃⲟⲗ·ⲙⲡⲉⲙⲧⲟⲉⲃⲟⲗⲙⲡⲟⲩⲟⲉⲓⲛ·ⲛⲥⲉⲧⲙϥⲱⲧⲉⲉⲃⲟⲗⲛⲧⲁⲛⲟⲙⲓⲁⲛⲧϩⲩⲗⲏⲉⲛⲧⲁⲥⲧⲁⲩⲟϥⲉⲃⲟⲗ.ⲁⲩⲱⲡⲉⲩⲛⲟⲃⲉϩⲓⲟⲩⲥⲟⲡⲉϥⲉϣⲱⲡⲉⲙⲡⲉⲙⲧⲟⲉⲃⲟⲗⲙⲡⲟⲩⲟⲉⲓⲛⲛϣⲁⲉⲛⲉϩ·ⲁⲩⲱⲛⲥⲉⲧⲙⲕⲁⲁⲩⲉⲛⲁⲩⲉⲃⲟⲗ.ⲛⲥⲉϥⲓⲡⲉⲩⲣⲁⲛϩⲛⲧⲟⲡⲟⲥⲛⲓⲙ·ⲉⲃⲟⲗϫⲉⲙⲡⲟⲩϯⲥⲟⲉⲣⲟⲓ·ⲁⲩⲱⲁⲩϩⲱϫⲙⲡⲉⲛⲧⲁⲩϥⲓⲡⲉϥⲟⲩⲟⲉⲓⲛ·ⲙⲛⲧⲉϥϭⲟⲙ·ⲁⲩⲱⲟⲛⲙⲛⲛⲥⲁⲛⲉⲧⲛⲁⲩϫⲟⲓⲛϩⲏⲧⲟⲩ·ⲁⲩⲟⲩⲉϣϥⲓⲡⲁⲟⲩⲟⲉⲓⲛⲧⲏⲣϥⲛϩⲏⲧⲁⲩⲙⲉⲣⲉⲉⲓⲉⲡⲉⲥⲏⲧⲉⲡⲉⲭⲁⲟⲥ·ⲉⲩⲉϣⲱⲡⲉⲛϩⲏⲧϥ·ⲁⲩⲱⲛⲛⲉϥⲛⲧⲟⲩⲉϩⲣⲁⲓϫⲓⲛⲙⲡⲉⲓⲛⲁⲩⲙⲡⲟⲩⲉϣⲡⲙⲁⲛϣⲱⲡⲉⲙⲡⲧⲟⲡⲟⲥⲛⲧⲇⲓⲕⲁⲓⲟⲥⲩⲛⲏⲁⲩⲱⲛⲛⲉⲩϫⲓⲧⲟⲩⲉⲣⲟϥϫⲓⲛⲙⲡⲉⲓⲛⲁⲩⲁϥϯⲡⲕⲁⲕⲉϩⲓⲱⲱϥⲛⲧϩⲉⲛⲟⲩⲉⲛⲇⲩⲙⲁⲁⲩⲱⲁϥⲃⲱⲕⲉϩⲟⲩⲛⲉϩⲏⲧϥⲛⲧϩⲉⲛⲟⲩⲙⲙⲟⲟⲩ·ⲁⲩⲱⲁϥⲃⲱⲕⲉϩⲟⲩⲛⲉⲛⲉϥϭⲟⲙⲧⲏⲣⲟⲩⲛⲧϩⲉⲛⲟⲩⲛⲉϩ·ⲙⲁⲣⲉϥϭⲟⲟⲗⲉϥⲙⲡⲉⲭⲁⲟⲥⲛⲧϩⲉⲛⲟⲩϩⲟⲓⲧⲉ·ⲁⲩⲱⲛϥⲙⲟⲣⲉϥⲙⲡⲕⲁⲕⲉⲛⲧϩⲉⲛⲟⲩⲛⲍⲱⲛⲏⲛϣⲁⲁⲣⲛⲟⲩⲟⲉⲓϣⲛⲓⲙ·ⲉⲣⲉⲛⲁⲓϣⲱⲡⲉⲛⲛⲉⲛⲧⲁⲩⲛⲛⲁⲓⲉϫⲱⲓⲉⲧⲃⲉⲡⲟⲩⲟⲉⲓⲛ·ⲁⲩⲱⲛⲉⲛⲧⲁⲩϫⲟⲟⲥϫⲉⲙⲁⲣⲛϥⲓⲧⲉⲥϭⲟⲙⲧⲏⲣⲥ·
ⲛⲧⲟⲕⲇⲉⲡⲟⲩⲟⲉⲓⲛϣⲛϩⲧⲏⲕϩⲁⲣⲟⲓⲉⲧⲃⲉⲡⲙⲩⲥⲧⲏⲣⲓⲟⲛⲙⲡⲉⲕⲣⲁⲛ·ⲁⲩⲱⲛⲁϩⲙⲉⲧϩⲛⲧⲙⲛⲧⲭⲣⲓⲥⲧⲟⲥⲛⲧⲉⲡⲉⲕⲛⲁ·ⲉⲃⲟⲗϫⲉⲁⲩϥⲓⲡⲁⲟⲩⲟⲉⲓⲛⲙⲛⲧⲁϭⲟⲙ·ⲁⲩⲱⲁⲧⲁϭⲟⲙⲥⲁⲗⲉⲩⲉϩⲓϩⲟⲩⲛⲙⲙⲟⲓ·ⲁⲩⲱⲙⲡⲓϣⲁϩⲉⲣⲁⲧϩⲛⲧⲉⲩⲙⲏⲧⲉ·ⲁⲓⲣⲧϩⲉⲛⲟⲩϩⲩⲗⲏⲉⲁⲥϩⲉ·ⲁⲩⲛⲟⲩϫⲉⲙⲙⲟⲓⲉⲡⲓⲥⲁⲙⲛⲡⲁⲓⲛⲧϩⲉⲛⲟⲩⲣⲉϥϣⲟⲟⲣⲉϥϩⲛⲡⲁⲏⲣ·ⲁⲧⲁϭⲟⲙⲧⲁⲕⲟϫⲉⲙⲛⲧⲁⲓⲙⲩⲥⲧⲏⲣⲓⲟⲛⲙⲙⲁⲩ·ⲁⲩⲱⲁⲧⲁϩⲩⲗⲏϩⲱⲕⲙⲉⲧⲃⲉⲡⲁⲟⲩⲟⲉⲓⲛϫⲉⲁⲩϥⲓⲧϥ·ⲁⲩⲱⲁⲛⲟⲕⲛⲉⲩⲥⲕⲱⲡⲧⲉⲙⲙⲟⲓⲡⲉ·ϣⲁⲩϭⲱϣⲧⲉⲣⲟⲓⲉⲩϫⲱⲣⲙⲉⲣⲟⲓ·ⲃⲟⲏⲑⲉⲓⲉⲣⲟⲓⲕⲁⲧⲁⲧⲉⲕⲙⲛⲧϣⲁⲛϩⲧⲏϥ·
ⲧⲉⲛⲟⲩϭⲉⲡⲉⲧⲉⲣⲉⲡⲉϥⲡⲛⲁⲣⲟⲟⲩⲧ.ⲙⲁⲣⲉϥⲉⲓⲉⲧϩⲏⲛϥϫⲉⲡⲃⲱⲗⲛⲧⲙⲉϩⲙⲛⲧⲥⲛⲟⲟⲩⲥⲙⲙⲉⲧⲁⲛⲟⲓⲁⲛⲧⲡⲓⲥⲧⲓⲥⲥⲟⲫⲓⲁ·
ⲁϥⲉⲓⲇⲉⲉⲧϩⲏⲛϭⲓⲁⲛⲇⲣⲉⲁⲥⲡⲉϫⲁϥϫⲉⲡⲁϫⲟⲉⲓⲥⲡⲥⲱⲧⲏⲣⲁⲧⲉⲕϭⲟⲙⲛⲟⲩⲟⲉⲓⲛⲡⲣⲟⲫⲏⲧⲉⲩⲉⲙⲡⲓⲟⲩⲟⲉⲓϣϩⲓⲧⲛⲇⲁⲩⲉⲓⲇ·ⲉⲧⲃⲉⲧⲉⲓⲙⲉⲧⲁⲛⲟⲓⲁⲉⲛⲧⲁⲥϫⲟⲟⲥⲛϭⲓⲧⲡⲓⲥⲧⲓⲥⲥⲟⲫⲓⲁ·ⲁⲩⲱⲁⲥϫⲟⲟⲥϩⲙⲡⲙⲉϩϣⲉ·ⲙⲛϣⲙⲟⲩⲛⲙⲯⲁⲗⲙⲟⲥϫⲉⲡⲛⲟⲩⲧⲉⲙⲡⲣⲕⲁⲣⲱⲕⲉⲡⲁⲥⲙⲟⲩ·ϫⲉⲧⲧⲁⲡⲣⲟⲙⲡⲣⲉϥⲣⲛⲟⲃⲉⲙⲛⲡⲉⲕⲣⲟϥ·
ⲁⲩⲟⲩⲱⲛⲛⲣⲣⲱⲟⲩⲉϩⲣⲁⲓⲉϫⲱⲓ·ⲁⲩϣⲁϫⲉⲛⲥⲱⲓϩⲛⲟⲩⲗⲁⲥⲛⲕⲣⲟϥ·ⲁⲩⲱϣⲁⲩⲕⲱⲧⲉⲉⲣⲟⲓϩⲛϩⲉⲛϣⲁϫⲉⲙⲙⲟⲥⲧⲉ·ⲁⲩⲱⲁⲩⲙⲓϣⲉⲛⲙⲙⲁⲓⲉⲡϫⲓⲛϫⲏⲉⲡⲙⲁⲛⲥⲉⲙⲉⲣⲓⲧ.ⲁⲩⲇⲓⲁⲃⲁⲗⲉⲙⲙⲟⲓ·
ⲁⲛⲟⲕⲇⲉⲛⲉⲓϣⲗⲏⲗⲡⲉ·
ⲁⲩⲥⲙⲓⲛⲉⲛⲟⲩⲏⲓⲛϩⲉⲛⲡⲉⲧϩⲟⲟⲩⲉⲡⲙⲁⲛϩⲉⲛⲡⲉⲧⲛⲁⲛⲟⲩⲟⲩ·ⲁⲩⲱⲟⲩⲙⲟⲥⲧⲉⲉⲡⲙⲁⲛⲧⲁⲁⲅⲁⲡⲏ·ⲕⲁⲑⲓⲥⲧⲁⲛⲟⲩⲣⲉϥⲣⲛⲟⲃⲉⲉϩⲣⲁⲓⲉϫⲱϥ·ⲁⲩⲱⲙⲁⲣⲉⲡⲇⲓⲁⲃⲟⲗⲟⲥⲁϩⲉⲣⲁⲧϥϩⲓⲟⲩⲛⲁⲙⲙⲙⲟϥ·
ⲉⲩϣⲁⲛϯϩⲁⲡⲉⲣⲟϥ·ⲙⲁⲣⲉϥⲉⲃⲟⲗⲉϥⲧϭⲁⲓⲏⲩ·ⲁⲩⲱⲙⲁⲣⲉⲡⲉϥϣⲗⲏⲗϣⲱⲡⲉⲉⲩⲛⲟⲃⲉ·ⲙⲁⲣⲉⲛⲉϥϩⲟⲟⲩⲥⲃⲟⲕⲁⲩⲱⲙⲁⲣⲉⲕⲉⲟⲩⲁϫⲓⲛⲧⲉϥⲙⲛⲧⲉⲡⲓⲥⲕⲟⲡⲟⲥ·ⲙⲁⲣⲉⲛⲉϥϣⲏⲣⲉⲣⲟⲣⲫⲁⲛⲟⲥ·ⲁⲩⲱⲙⲁⲣⲉⲧⲉϥⲥϩⲓⲙⲉⲣⲭⲏⲣⲁ·ⲙⲁⲣⲟⲩⲕⲓⲙⲉⲛⲉϥϣⲏⲣⲉ·ⲁⲩⲱⲙⲁⲣⲟⲩⲡⲟⲟⲛⲟⲩⲉⲃⲟⲗⲛⲥⲉⲧⲱⲃϩ·
ⲙⲁⲣⲟⲩⲛⲟϫⲟⲩⲉⲃⲟⲗϩⲛⲛⲉⲩⲏⲓ·ⲙⲁⲣⲉⲡⲇⲁⲛⲓⲥⲧⲏⲥⲙⲉϣⲧⲛⲉⲧϣⲟⲟⲡⲛⲁϥⲧⲏⲣⲟⲩ·ⲁⲩⲱⲙⲁⲣⲉϩⲉⲛϣⲙⲙⲟⲧⲱⲣⲡⲛⲛⲉϥϩⲓⲥⲉⲧⲏⲣⲟⲩ·ⲙⲡⲣⲧⲣⲉϥϣⲱⲡⲉⲛϭⲓⲡⲉⲧⲛⲁϯⲧⲟⲟⲧϥ·ⲟⲩⲇⲉⲙⲡⲣⲧⲣⲉϣⲁⲛϩⲧⲏϥϣⲱⲡⲉⲛⲛⲉϥⲟⲣⲫⲁⲛⲟⲥ·
ⲙⲁⲣⲟⲩϥⲉⲧⲛⲉϥϣⲏⲣⲉⲉⲃⲟⲗⲁⲩⲱⲙⲁⲣⲟⲩϥⲉⲧⲡⲉϥⲣⲁⲛⲉⲃⲟⲗϩⲛⲟⲩⲅⲉⲛⲉⲁⲛⲟⲩⲱⲧ·ⲙⲁⲣⲟⲩⲣⲡⲙⲉⲉⲩⲉⲙⲡⲛⲟⲃⲉⲛⲛⲉϥⲉⲓⲟⲧⲉⲙⲡⲉⲙⲧⲟⲉⲃⲟⲗⲙⲡϫⲟⲉⲓⲥ·
ⲁⲩⲱⲙⲡⲣⲧⲣⲉⲩϥⲱⲧⲉⲉⲃⲟⲗⲛⲧⲁⲛⲟⲙⲓⲁⲛⲧⲉϥⲙⲁⲁⲩ·
ⲙⲁⲣⲟⲩϣⲱⲡⲉⲙⲡⲉⲙⲧⲟⲉⲃⲟⲗⲙⲡϫⲟⲉⲓⲥⲙⲟⲩⲟⲉⲓϣⲛⲓⲙ·
ⲙⲁⲣⲟⲩϫⲉⲣⲉⲡⲉϥⲣⲡⲙⲉⲉⲩⲉⲉⲃⲟⲗϩⲙⲡⲕⲁϩ·ⲉⲡⲙⲁϫⲉⲙⲡϥⲣⲡⲙⲉⲉⲩⲉⲉⲉⲓⲣⲉⲛⲟⲩⲛⲁ·ⲁⲩⲱⲁϥⲡⲱⲧⲛⲥⲁⲟⲩⲣⲱⲙⲉⲛϩⲏⲕⲉ·ⲁⲩⲱⲛⲉⲃⲓⲏⲛ·ⲁⲩⲱⲁϥⲇⲓⲱⲕⲉⲛⲥⲁⲟⲩⲁⲉϥⲙⲟⲕϩⲛϩⲏⲧ·ⲉⲙⲟⲟⲩⲧϥ·
ⲁϥⲙⲉⲣⲉⲡⲥⲁϩⲟⲩⲁⲩⲱⲉϥⲉⲉⲓⲛⲁϥ·ⲙⲡϥⲟⲩⲉϣⲡⲉⲥⲙⲟⲩⲉϥⲉⲟⲩⲉⲉⲃⲟⲗⲙⲙⲟϥ·ⲁϥϯⲡⲥⲁϩⲟⲩϩⲓⲱⲱϥⲛⲧϩⲉⲛⲟⲩϣⲧⲏⲛ·ⲁⲩⲱⲁϥⲃⲱⲕⲉⲛⲉϥⲥⲁⲛϩⲟⲩⲛⲛⲧϩⲉⲛⲟⲩⲙⲟⲟⲩ·ⲁϥⲣⲧϩⲉⲛⲟⲩⲙⲉϩϩⲛⲛⲉϥⲕⲉⲉⲥ·ⲙⲁⲣⲉϥϣⲱⲡⲉⲛⲁϥⲛⲧϩⲉⲛⲧϩⲃⲥⲱⲉⲧϥⲛⲁϭⲟⲟⲗⲉϥⲙⲙⲟϥ·ⲁⲩⲱⲛⲧϩⲉⲛⲟⲩⲛⲍⲱⲛⲏⲉϥⲛⲁⲙⲟⲣϥⲙⲙⲟⲥⲛⲟⲩⲟⲉⲓϣⲛⲓⲙ·
ⲡⲁⲓⲡⲉⲡϩⲱⲃⲛⲛⲉⲧⲇⲓⲁⲃⲁⲗⲉϩⲁⲧⲙⲡϫⲟⲉⲓⲥⲁⲩⲱⲛⲉⲧϫⲱⲛϩⲉⲛⲡⲁⲣⲁⲛⲟⲙⲟⲛⲉϩⲟⲩⲛⲉⲧⲁⲯⲩⲭⲏ.
ⲛⲧⲟⲕⲇⲉⲡϫⲟⲉⲓⲥⲡϫⲟⲉⲓⲥⲁⲣⲓⲟⲩⲛⲁⲛⲙⲙⲁⲓⲉⲧⲃⲉⲡⲉⲕⲣⲁⲛ·
ⲙⲁⲧⲟⲩϫⲟⲓϫⲉⲁⲛⲅⲟⲩϩⲏⲕⲉⲁⲩⲱⲁⲛⲅⲟⲩⲉⲃⲓⲏⲛ·ⲁⲡⲁϩⲏⲧϣⲧⲟⲣⲧⲣⲙⲡⲁⲥⲁⲛϩⲟⲩⲛ·ⲁⲩϥⲓⲧⲛⲧⲙⲏⲧⲉⲛⲧϩⲉⲛⲛⲟⲩϩⲁⲓⲃⲉⲥⲉⲁⲥⲣⲓⲕⲉ.ⲁⲩⲛⲟϣⲡⲧⲉⲃⲟⲗⲛⲧϩⲉⲛϩⲉⲛϣϫⲉ·ⲁⲛⲁⲡⲁⲧϭⲃⲃⲉϩⲛⲧⲛⲏⲥⲧⲉⲓⲁ·ⲁⲩⲱⲁⲧⲁⲥⲁⲣⲝϣⲓⲃⲉⲉⲧⲃⲉⲡⲛⲉϩ·ⲁⲛⲟⲕⲇⲉⲁⲓϣⲱⲡⲉⲛⲁⲩⲛⲛⲟϭⲛⲉϭ·
ⲁⲩⲛⲁⲩⲉⲣⲟⲓⲁⲩⲱⲁⲩⲕⲓⲙⲛⲛⲉⲩⲁⲡⲏⲩⲉ·ⲃⲟⲏⲑⲉⲓⲉⲣⲟⲓⲡϫⲟⲉⲓⲥⲡⲛⲟⲩⲧⲉⲁⲩⲱⲧⲟⲩϫⲟⲓⲕⲁⲧⲁⲡⲉⲕⲛⲁ·
ⲙⲁⲣⲟⲩⲉⲓⲙⲉϫⲉⲧⲁⲓⲧⲉⲧⲉⲕϭⲓϫ·ⲁⲩⲱⲛⲧⲟⲕⲁⲕⲧⲁⲙⲓⲟⲥⲡϫⲟⲉⲓⲥ·
ⲡⲁⲓϭⲉⲡⲉⲡⲃⲱⲗⲛⲧⲙⲉϩⲙⲛⲧⲥⲛⲟⲟⲩⲥⲙⲙⲉⲧⲁⲛⲟⲓⲁ·ⲧⲁⲓⲉⲛⲧⲁⲥϫⲟⲟⲥⲛϭⲓⲧⲡⲓⲥⲧⲓⲥⲥⲟⲫⲓⲁⲉⲥϩⲙⲡⲉⲭⲁⲟⲥ·
ⲁϥⲟⲩⲱϩⲇⲉⲟⲛⲉⲧⲟⲟⲧϥⲛϭⲓⲓⲏⲥⲟⲩⲥϩⲙⲡϣⲁϫⲉⲡⲉϫⲁϥⲛⲛⲉϥⲙⲁⲑⲏⲧⲏⲥ·ϫⲉⲁⲥϣⲱⲡⲉⲟⲛⲙⲛⲛⲥⲁⲛⲁⲓⲁⲥⲱϣⲉϩⲣⲁⲓⲟⲩⲏⲓⲛϭⲓⲧⲡⲓⲥⲧⲓⲥⲥⲟⲫⲓⲁ·ⲉⲥϫⲱⲙⲙⲟⲥϫⲉⲡⲟⲩⲟⲉⲓⲛⲛⲟⲩⲟⲓⲛⲛⲧⲁⲓⲡⲁⲣⲁⲃⲁϩⲙⲡⲙⲛⲧⲥⲛⲟⲟⲩⲥⲛⲁⲓⲱⲛ·ⲁⲓⲉⲓⲉⲡⲉⲥⲏⲧⲛϩⲏⲧⲟⲩ·
ⲉⲧⲃⲉⲡⲁⲓⲁⲓϫⲱⲛϯⲙⲛⲧⲥⲛⲟⲟⲩⲥⲙⲙⲉⲧⲁⲛⲟⲓⲁⲕⲁⲧⲁⲡⲟⲩⲁⲡⲟⲩⲁⲛⲁⲓⲱⲛ·ⲧⲉⲛⲟⲩϭⲉⲡⲟⲩⲟⲉⲓⲛⲛⲛⲟⲩⲟⲉⲓⲛⲕⲱⲛⲁⲓⲉⲃⲟⲗⲛⲧⲁⲡⲁⲣⲁⲃⲁⲥⲓⲥϫⲉⲟⲩⲛⲟϭⲉⲙⲁⲧⲉⲧⲉϫⲉⲁⲓⲕⲱⲛⲥⲱⲓⲛⲛⲧⲟⲡⲟⲥⲙⲡϫⲓⲥⲉⲁⲓⲉⲓⲁⲓⲟⲩⲱϩϩⲛⲛⲧⲟⲡⲟⲥⲙⲡⲉⲭⲁⲟⲥⲛⲁⲓϭⲉⲛⲧⲉⲣⲉⲥϫⲟⲟⲩⲛϭⲓⲧⲡⲓⲥⲧⲓⲥⲥⲟⲫⲓⲁ·ⲁⲥⲟⲩⲱϩⲟⲛⲉⲧⲟⲟⲧⲥϩⲛⲧⲙⲉϩⲙⲛⲧϣⲟⲙⲧⲉⲙⲙⲉⲧⲁⲛⲟⲓⲁⲉⲥϫⲱⲙⲙⲟⲥ·ϫⲉⲥⲱⲧⲙⲉⲣⲟⲓⲉⲓϩⲩⲙⲛⲉⲩⲉⲉⲣⲟⲕⲡⲟⲩⲟⲉⲓⲛⲛⲛⲟⲩⲟⲉⲓⲛ·
ⲥⲱⲧⲙⲉⲣⲟⲓⲉⲓϫⲱⲛⲧⲙⲉⲧⲁⲛⲟⲓⲁⲙⲡⲙⲉϩⲙⲛⲧϣⲟⲙⲧⲉⲛⲁⲓⲱⲛ·ⲡⲧⲟⲡⲟⲥⲉⲛⲧⲁⲓⲉⲓⲉⲡⲉⲥⲏⲧⲉⲃⲟⲗⲛϩⲏⲧϥ·ϫⲉⲕⲁⲥⲉⲥⲉϫⲱⲕⲉⲃⲟⲗⲛϭⲓⲧⲙⲉϩⲙⲛⲧϣⲟⲙⲧⲉⲙⲙⲉⲧⲁⲛⲟⲓⲁⲛⲧⲉⲡⲙⲉϩⲙⲛⲧϣⲟⲙⲧⲉⲛⲁⲓⲱⲛ·ⲛⲁⲓⲛⲧⲁⲓⲡⲁⲣⲁⲃⲁⲁⲓⲉⲓⲉⲡⲉⲥⲏⲧⲉⲃⲟⲗⲛϩⲏⲧⲟⲩⲧⲉⲛⲟⲩϭⲉⲡⲟⲩⲟⲉⲓⲛⲛⲛⲟⲩⲟⲉⲓⲛⲥⲱⲧⲙⲉⲣⲟⲓⲉⲓϩⲩⲙⲛⲉⲩⲉⲉⲣⲟⲕϩⲙⲡⲙⲉϩⲙⲛⲧϣⲟⲙⲧⲉⲛⲁⲓⲱⲛⲡⲁⲧⲟⲡⲟⲥⲉⲛⲧⲁⲓⲉⲓⲉⲃⲟⲗⲛϩⲏⲧϥⲛⲁϩⲙⲉⲧⲡⲟⲩⲟⲉⲓⲛϩⲙⲡⲉⲕⲛⲟϭⲙⲙⲩⲥⲧⲏⲣⲓⲟⲛ·ⲁⲩⲱⲕⲱⲉⲃⲟⲗⲛⲧⲁⲡⲁⲣⲁⲃⲁⲥⲓⲥⲉϩⲣⲁⲓϩⲛⲧⲉⲕⲙⲛⲧⲣⲉϥⲕⲱⲉⲃⲟⲗ·ⲁⲩⲱⲙⲁⲛⲁⲓⲙⲃⲁⲡⲧⲓⲥⲙⲁⲛⲅⲕⲱⲉⲃⲟⲗⲛⲛⲁⲛⲟⲃⲉ·
ⲁⲩⲱⲛⲅⲧⲃⲃⲟⲓⲉⲃⲟⲗϩⲛⲧⲁⲡⲁⲣⲁⲃⲁⲥⲓⲥⲁⲩⲱⲧⲁⲡⲁⲣⲁⲃⲁⲥⲓⲥⲁⲛⲟⲕⲧⲉϯϭⲟⲙⲛϩⲟⲙⲙⲟⲩⲓⲧⲁⲓⲉⲧⲉⲛⲛⲉⲥϩⲱⲡⲉⲣⲟⲕⲛⲟⲩⲟⲉⲓϣⲛⲓⲙ·ϫⲉⲛⲧⲁⲓⲉⲓⲉⲡⲉⲥⲏⲧⲉⲧⲃⲏⲏⲧⲥ·ⲁⲩⲱⲁⲛⲟⲕⲁⲓⲡⲁⲣⲁⲃⲁⲙⲁⲩⲁⲁⲧ.ϩⲛⲛⲁϩⲟⲣⲁⲧⲟⲥⲉϯϣⲟⲟⲡϩⲙⲡⲉⲩⲧⲟⲡⲟⲥ·ⲁⲓⲉⲓⲉⲡⲉⲥⲏⲧⲉⲡⲉⲭⲁⲟⲥ·
ⲁⲓⲡⲁⲣⲁⲃⲁⲛⲛⲁϩⲣⲁⲕ·ϫⲉⲕⲁⲥⲉⲣⲉⲡⲉⲕⲧⲱϣϫⲱⲕⲉⲃⲟⲗ·ⲛⲁⲓϭⲉⲁⲥϫⲟⲟⲩⲛϭⲓⲧⲡⲓⲥⲧⲓⲥⲥⲟⲫⲓⲁ·ⲧⲉⲛⲟⲩϭⲉⲡⲉⲧⲉⲣⲉⲡⲉϥⲡⲛⲁⲕⲓⲙⲉⲣⲟϥⲉⲧⲣⲉϥⲛⲟⲉⲓⲛⲛⲉⲥϣⲁϫⲉ·ⲙⲁⲣⲉϥⲉⲓⲉⲧϩⲏⲛϥⲧⲁⲩⲉⲡⲉⲩⲛⲟⲏⲙⲁ·
ⲁⲥⲉⲓⲉⲧϩⲏⲛϭⲓⲙⲁⲣⲑⲁⲡⲉϫⲁⲥϫⲉⲡⲁϫⲟⲉⲓⲥ·ⲡⲁⲡⲛⲉⲩⲙⲁⲕⲓⲙⲉⲣⲟⲓⲉⲧⲣⲁⲧⲁⲩⲉⲡⲃⲱⲗⲛⲛⲉⲛⲧⲁⲥϫⲟⲟⲩⲛϭⲓⲧⲡⲓⲥⲧⲓⲥⲥⲟⲫⲓⲁ·ⲁⲧⲉⲕϭⲟⲙⲡⲣⲟⲫⲏⲧⲉⲩⲉⲙⲡⲓⲟⲩⲟⲉⲓϣⲉⲧⲃⲏⲏⲧⲟⲩϩⲓⲧⲛⲇⲁⲩⲉⲓⲇ·ϩⲙⲡⲙⲉϩⲧⲁⲓⲟⲩⲙⲯⲁⲗⲙⲟⲥⲉⲥϫⲱⲙⲙⲟⲥⲛⲧⲉⲓϩⲉ·ϫⲉⲛⲁⲛⲁⲓⲡⲛⲟⲩⲧⲉⲕⲁⲧⲁⲡⲉⲕⲛⲟϭⲛⲛⲁⲕⲁⲧⲁⲡⲁϣⲁⲓⲛⲛⲉⲕⲙⲛⲧϣⲁⲛϩⲧⲏϥϥⲱⲧⲉⲉⲃⲟⲗⲙⲡⲁⲛⲟⲃⲉⲉⲓⲁⲁⲧⲉⲙⲁⲧⲉⲉⲃⲟⲗϩⲛⲧⲁⲁⲛⲟⲙⲓⲁ·ⲁⲩⲱⲡⲁⲛⲟⲃⲉⲙⲡⲁⲙⲧⲟⲉⲃⲟⲗⲛⲟⲩⲟⲉⲓϣⲛⲓⲙϫⲉⲕⲁⲥⲉⲕⲉⲧⲙⲁⲓⲟϩⲛⲛⲉⲕϣⲁϫⲉ·ⲁⲩⲱⲛⲅϫⲣⲟϩⲙⲡⲧⲣⲉⲕϯϩⲁⲡⲉⲣⲟⲓ·
ⲡⲁⲓⲡⲉⲡⲃⲱⲗⲛⲛϣⲁϫⲉⲛⲧⲁⲥϫⲟⲟⲩⲛϭⲓⲧⲡⲓⲥⲧⲓⲥⲥⲟⲫⲓⲁ·ⲡⲉϫⲁϥⲛⲁⲥⲛϭⲓⲓⲏⲥⲟⲩⲥ·ϫⲉⲉⲩⲅⲉⲕⲁⲗⲱⲥⲙⲁⲣⲑⲁⲧⲙⲁⲕⲁⲣⲓⲁ·
ⲁϥⲟⲩⲱϩⲇⲉⲟⲛⲉⲧⲟⲟⲧϥⲛϭⲓⲓⲏⲥⲟⲩⲥϩⲙⲡϣⲁϫⲉⲡⲉϫⲁϥⲛⲛⲉϥⲙⲁⲑⲏⲧⲏⲥϫⲉⲁⲥϣⲱⲡⲉϭⲉⲛⲧⲉⲣⲉⲧⲡⲓⲥⲧⲓⲥⲥⲟⲫⲓⲁϫⲱⲛⲛⲉⲓϣⲁϫⲉⲁϥϫⲱⲕⲉⲃⲟⲗⲛϭⲓⲡⲉⲟⲩⲟⲉⲓϣⲉⲧⲣⲉⲩⲛⲧⲥⲉϩⲣⲁⲓϩⲙⲡⲉⲭⲁⲟⲥⲁⲩⲱⲉⲃⲟⲗϩⲓⲧⲟⲟⲧⲙⲙⲓⲛⲙⲙⲟⲓⲭⲱⲣⲓⲥⲡϣⲟⲣⲡⲙⲙⲩⲥⲧⲏⲣⲓⲟⲛ·ⲁⲓⲉⲓⲛⲉⲛⲟⲩϭⲟⲙⲛⲟⲩⲟⲉⲓⲛⲉⲃⲟⲗⲛϩⲏⲧ·ⲁⲓϫⲛⲁⲥⲉϩⲣⲁⲓⲉⲡⲉⲭⲁⲟⲥ·ⲉⲧⲣⲉⲥⲛⲧⲡⲓⲥⲧⲓⲥⲥⲟⲫⲓⲁⲉϩⲣⲁⲓϩⲛⲛⲧⲟⲡⲟⲥⲉⲧϣⲏⲕⲛⲧⲉⲡⲉⲭⲁⲟⲥ·ⲛⲥⲉⲛⲧⲥⲉⲡⲓⲧⲟⲡⲟⲥⲉⲧⲙⲡⲉⲧⲡⲉⲙⲡⲉⲭⲁⲟⲥ·ϣⲁⲛⲧⲉⲧⲕⲉⲗⲉⲩⲥⲓⲥⲉⲓⲉⲃⲟⲗϩⲓⲧⲙⲡⲓϣⲟⲣⲡⲙⲙⲩⲥⲧⲏⲣⲓⲟⲛ·ⲉⲧⲣⲉⲩⲛⲧⲥⲉϩⲣⲁⲓϩⲙⲡⲉⲭⲁⲟⲥⲉⲡⲧⲏⲣϥ·ⲁⲩⲱⲁⲧⲁϭⲟⲙⲛⲟⲩⲟⲉⲓⲛⲁⲥⲛⲧⲡⲓⲥⲧⲓⲥⲥⲟⲫⲓⲁⲉϩⲣⲁⲓⲉⲛⲧⲟⲡⲟⲥⲉⲧⲙⲡⲥⲁⲛⲧⲡⲉⲙⲡⲉⲭⲁⲟⲥ·ⲁⲥϣⲱⲡⲉϭⲉⲛⲧⲉⲣⲟⲩⲉⲓⲙⲉⲛϭⲓⲛⲉⲡⲣⲟⲃⲟⲗⲟⲟⲩⲉⲙⲡⲁⲩⲑⲁⲇⲏⲥϫⲉⲁⲩⲛⲧⲡⲓⲥⲧⲓⲥⲥⲟⲫⲓⲁⲉϩⲣⲁⲓⲉⲛⲧⲟⲡⲟⲥⲉⲧⲙⲡⲥⲁⲛⲧⲡⲉⲙⲡⲉⲭⲁⲟⲥ.ⲁⲩⲡⲱⲧⲟⲛⲛⲥⲱⲥⲉⲡϫⲓⲥⲉⲉⲩⲟⲩⲉϣϫⲓⲧⲥⲟⲛⲉⲛⲧⲟⲡⲟⲥⲉⲧⲙⲡⲉⲭⲁⲟⲥⲙⲡⲉⲥⲏⲧ·ⲁⲩⲱⲛⲉⲥⲣⲟⲩⲟⲓⲛⲡⲉⲉⲙⲁⲧⲉⲛϭⲓⲧⲁϭⲟⲙⲛⲟⲩⲟⲉⲓⲛⲧⲁⲓⲉⲛⲧⲁⲓϫⲟⲟⲩⲥⲉⲛⲧⲥⲟⲫⲓⲁⲉϩⲣⲁⲓϩⲙⲡⲉⲭⲁⲟⲥ·
ⲁⲥϣⲱⲡⲉϭⲉⲛⲧⲉⲣⲟⲩⲡⲱⲧⲛⲥⲁⲧⲥⲟⲫⲓⲁⲛϭⲓⲛⲉⲡⲣⲟⲃⲟⲗⲟⲟⲩⲉⲙⲡⲁⲩⲑⲁⲇⲏⲥⲛⲧⲉⲣⲟⲩⲛⲧⲥⲉⲛⲧⲟⲡⲟⲥⲉⲧⲙⲡⲥⲁⲛⲧⲡⲉⲙⲡⲉⲭⲁⲟⲥ.
ⲁⲥϩⲩⲙⲛⲉⲩⲉⲟⲛⲁⲩⲱⲁⲥⲱϣⲉϩⲣⲁⲓⲟⲩⲏⲓⲉⲥϫⲱⲙⲙⲟⲥϫⲉϯⲛⲁϩⲩⲙⲛⲉⲩⲉⲉϩⲣⲁⲓⲉⲣⲟⲕⲡⲟⲩⲟⲉⲓⲛϫⲉⲁⲓⲟⲩⲉϣⲉⲓⲉⲣⲁⲧⲕϯⲛⲁϩⲩⲡⲛⲉⲩⲉⲉϩⲣⲁⲓⲉⲣⲟⲕⲡⲟⲩⲟⲉⲓⲛϫⲉⲛⲧⲟⲕⲡⲉⲡⲁⲣⲉϥⲛⲟⲩϩⲙⲙⲡⲣⲕⲁⲁⲧϩⲙⲡⲉⲭⲁⲟⲥ·ⲛⲁϩⲙⲉⲧⲡⲟⲩⲟⲉⲓⲛⲛⲧⲉⲡϫⲓⲥⲉϫⲉⲛⲧⲟⲕⲡⲉⲛⲧⲁⲓϩⲩⲙⲛⲉⲩⲉⲉⲣⲟⲕ·
ⲁⲕⲧⲛⲛⲟⲟⲩⲛⲁⲓⲙⲡⲉⲕⲟⲩⲟⲉⲓⲛⲉⲃⲟⲗϩⲓⲧⲟⲟⲧⲕⲁⲩⲱⲁⲕⲛⲁϩⲙⲉⲧ·ⲁⲕⲛⲧⲉⲛⲧⲟⲡⲟⲥⲉⲧⲙⲡⲥⲁⲛⲧⲡⲉⲙⲡⲉⲭⲁⲟⲥ·
ⲙⲁⲣⲟⲩϩⲉϭⲉⲉⲡⲉⲥⲏⲧⲉⲛⲧⲟⲡⲟⲥⲉⲧϩⲓⲡⲉⲥⲏⲧⲙⲡⲉⲭⲁⲟⲥⲛϭⲓⲛⲉⲡⲣⲟⲃⲟⲗⲟⲟⲩⲉⲙⲡⲁⲩⲑⲁⲧⲏⲥⲛⲁⲓⲉⲧⲡⲏⲧⲛⲥⲱⲓ·ⲁⲩⲱⲙⲡⲣⲧⲣⲉⲩⲉⲓⲉⲛⲧⲟⲡⲟⲥⲉⲧⲙⲡⲥⲁⲛⲧⲡⲉⲉⲧⲣⲉⲩⲛⲁⲩⲉⲣⲟⲓ·ⲁⲩⲱⲙⲁⲣⲉⲟⲩⲛⲟϭⲛⲕⲁⲕⲉϩⲱⲃⲥⲉⲃⲟⲗⲉϫⲱⲟⲩ·ⲁⲩⲱⲙⲁⲣⲉϥⲉⲓⲛⲁⲩⲛϭⲓⲟⲩϩⲗⲟⲥⲧⲛⲛⲕⲁⲕⲉ·ⲁⲩⲱⲙⲡⲣⲧⲣⲉⲩⲛⲁⲩⲉⲣⲟⲓϩⲙⲡⲟⲩⲟⲉⲓⲛⲛⲧⲉⲕϭⲟⲙⲧⲁⲓⲉⲛⲧⲁⲕⲧⲛⲛⲟⲟⲩⲥⲛⲁⲓⲉⲛⲁϩⲙⲉⲧ·ϫⲉⲛⲛⲉⲩⲁⲙⲁϩⲧⲉⲟⲛⲉϩⲣⲁⲓⲉϫⲱⲓ·ⲁⲩⲱⲡⲉⲩϣⲟϫⲛⲉⲉⲛⲧⲁⲩⲙⲉⲉⲩⲉⲉⲣⲟϥⲉⲧⲣⲉⲩϥⲓⲧⲁϭⲟⲙ·ⲙⲡⲣⲧⲣⲉϥϣⲱⲡⲉⲛⲁⲩ·ⲁⲩⲱⲕⲁⲧⲁⲧϩⲉⲉⲛⲧⲁⲩϣⲁϫⲉⲉⲣⲟⲓⲉϥⲓⲡⲁⲟⲩⲟⲉⲓⲛⲛϩⲏⲧ.ϥⲓⲡⲱⲟⲩϩⲱⲟⲩⲉⲡⲙⲁⲙⲡⲱⲓ·ⲁⲩⲱⲁⲩϫⲟⲟⲥⲉϥⲓⲡⲁⲟⲩⲟⲉⲓⲛⲧⲏⲣϥ·ⲁⲩⲱⲛⲉⲙⲡⲟⲩⲉϣϥⲓⲧϥ.ϫⲉⲧⲉⲕϭⲟⲙⲛⲟⲩⲟⲉⲓⲛϣⲟⲟⲡⲛⲧⲟⲕⲛⲙⲙⲁⲓ·ⲉⲃⲟⲗϫⲉⲁⲩϣⲟϫⲛⲉⲁϫⲙⲡⲉⲕⲧⲱϣⲡⲟⲩⲟⲉⲓⲛ·
ⲉⲧⲃⲉⲡⲁⲓⲙⲡⲟⲩⲉϣϥⲓⲡⲁⲟⲩⲟⲉⲓⲛⲉⲃⲟⲗϫⲉⲛⲧⲁⲓⲡⲓⲥⲧⲉⲩⲉ

ANNIS Metadata

annotation: Randy Komforty, Lance Martin, Amir Zeldes, Caroline T. Schroeder
author: unknown
collection: Additional Manuscripts
Coptic_edition: J. H. Petermann (1851), Carl Schmidt & Violet MacDermot (1978)
corpus: pistis.sophia
country: Egypt
document_cts_urn: urn:cts:copticLit:pistissophia.1.petermann:75-84
entities: automatic
identities: checked
idno: 5114
language: Sahidic Coptic
license: CC-BY 4.0 -
msItem_title: Pistis Sophia
msName: CMCL.AQ
next: urn:cts:copticLit:pistissophia.1.petermann:84-96
note: Text republished from Marcion Project, which used the Petermann edition. Coptic Scriptorium editorial changes limited to replacing missing text and moving the Zetas that indicated text segmentations to the beginning of words. In addition to the Mead (1896) English translation published here see also Horner (1924) translation on Archive.org.
objectType: codex
order: 07
origDate: 301-500
origDate_notAfter: 500
origDate_notBefore: 301
origDate_precision: medium
origPlace: unknown
pages_from: 174
pages_to: 205
parsing: automatic
paths_manuscripts: 17
paths_works: 684
people: Andrew the Apostle; David; Devil; James the Great; Jesus; Martha; Mary Magdalene; Saint Peter; Salome (disciple)
places: none
previous: urn:cts:copticLit:pistissophia.1.petermann:66-75
project: Coptic SCRIPTORIUM, Marcion
redundant: no
repository: British Library
segmentation: automatic
source: Marcion project, Archive.org
source_info: Marcion project, Petermann (1851) edition on Archive.org, Mead (1896) translation on gnosis.org
tagging: automatic
title: Pistis Sophia Book 1 Part 7
translation: none
Trismegistos: 107926
version_date: 2024-05-06
version_n: 5.0.0

Cite this Document

When citing a corpus or document from Coptic SCRIPTORIUM, please include the relevant URN(s) (provided below) in all citations. On this site, these URNs will resolve to the latest edition of our data. We also encourage researchers to save visualizations they use, download query results from ANNIS, and save information from document metadata.

Use the following model to cite this document. Our full citation guidelines page provides more models.

First citation:

Author, Ancient title [chapter.verse if available], ed. [annotators], trans. [translation]. urn:cts:copticLit:pistissophia.1.petermann:75-84. [version number], [date]. https://data.copticscriptorium.org/urn:cts:copticLit:pistissophia.1.petermann:75-84.

Subsequent citations:

Author, Ancient title (abbreviated) [chapter.verse if available], urn:cts:copticLit:pistissophia.1.petermann:75-84.

Document Edition: urn:cts:copticLit:pistissophia.1.petermann:75-84

Work: urn:cts:copticLit:pistissophia.1

Text Group: urn:cts:copticLit:pistissophia

The following links will direct you to the latest versions of data visualizations of the document.

Normalized Text HTML: https://data.copticscriptorium.org/urn:cts:copticLit:pistissophia.1.petermann:75-84/norm/html

Analytic Visualization HTML: https://data.copticscriptorium.org/urn:cts:copticLit:pistissophia.1.petermann:75-84/analytic/html

The following links will direct you to the latest versions of the data for download.

TEI XML: https://data.copticscriptorium.org/urn:cts:copticLit:pistissophia.1.petermann:75-84/tei/xml

Paula XML: https://data.copticscriptorium.org/urn:cts:copticLit:pistissophia.1.petermann:75-84/paula/xml

relANNIS: https://data.copticscriptorium.org/urn:cts:copticLit:pistissophia.1.petermann:75-84/relannis

The following link will direct you to the latest version of the corpus available for search and querying in ANNIS:

ANNIS UI: https://data.copticscriptorium.org/urn:cts:copticLit:pistissophia.1.petermann:75-84/annis